(HOK HOEI alias TELEFOON BOENTOENG!

17 Desember 1938 (HOK HOEI alias TELEFOON BOENTOENG!

-Astaga! Kenapa loe baroe sekarang dateng? Tadinja kan goea kira, loe bisa bikin beres itoe perkara tjoema dalem beberapa hari sadja. Tida taoenja, tida ada kabar, tida ada tjerita! Soerat jang satoe²nja loe saben kirim tjoema kasih taoe kepoetoesan ongkos dan minta kiriman oewang sadja! Apa loe kira goea ini goedang doeit! Tanja toean H.H. Kan alias Hok Hoei siansing pada tjabang atasnja jang diwadjibken djalan koeliling dari Anjer sampe Banjoewangi, oentoek tjioem baoe, tempat dari madjikannja berada dimana; apa warn atawa koud dari krosi Volksraad.
-Tapi owee moesti goenaken banjak ongkos. Tauwke! Sebab sebelonnja owee bisa pelet orang boeat diminta soearanja, lebih doeloe owee moesti ambil hatinja! Djawab Kek Sim satoe ondergod(*dewa bawahan) dari Hok Hoei siansing poenja perkoempoelan jang kesohor dan jang olehnja memang biasa dipake tenaganja oentoek beresken segala vieze-zaakjes begitoe. Tida, malah sebaliknja! Tjoema memang betoel kadang² ia keserimpet dalem djalanja dewi ini atawa dewi itoe. Katjoeali itoe satoe zwak boeat saben² „djato hati” boleh dibilang Hok Hoei siansing, panglima besar dari pasoekannja, ampir sempoerna, begitoe djaoeh itoe kasampoerna`an bisa dibilang dari satoe manoesia, kendati kedoedoekannja ada begitoe tinggi seperti Hok Hoei siansing, maski itoe „kedoedoekan tinggi” tjoema berada dalem impiannja sendiri dan dalem anggepannja beberapa orang jang pada berloetoet dibawahnja Hok Hoei siansing, meloeloe boeat peres si sapi, sebegitoe lama ini sapi toea masih bisa keloearken soesoenja.
-Hm! Ja, goea kenal loe! Tida ada banjaknja doeit!(**biasa papa saja kaloe tida maoe memberi saja oewang!; ini kata sering djoega saja denger doeloe) Sebentar boeat ini, sebentar boeat itoe. Tapi kebanjakan boeat loe poenja kantoeng sendiri! Djawab Hok Hoei siansing sembari keboelken asep rokok manilanja. Dan tjara ia senderken badannja di krosi belakang medja-toelis serta kebiasa’annja boeat keroetken djidatnja sembari tjintjing alisnja sebelah kiri dan begitoe roepa, hingga Hok Hoei siansing sampe dapet djoeloekan „Tepekong Gledek”, tida oesah ditanja lagi jang djoeloekan begitoe djelek tentoe keloear dari pihaknja moesoehnja Hok Hoei siansing. Padahal orangnja sebenernja boleh dikasih masoek dalem golongan bagoes djoega, djika sadja potongan moekanja tida begitoe menakoetkan, tapi hatinja emas; sampe diantara pendoedoek Tionghoa ada timboel ini pribahasa: „Kaloe maoe tjari orang jang baek hatinja, pegi Betawi dan tjari Hok Hoei!”
Koetika denger itoe toedoehan, Kek Sim membawa laga seolah-olah terperandjat dan menjesel jang ia didoega meloeloe liat doeit sadja. Tapi Hok Hoei siansing boekan anak kemaren doeloe jang gampang digertak. Apa lagi ia sendiri ada begitoe pande dalem hal boewang tingkah, hingga orang jang belon kenal padanja, sedikitnja diam² bisa tekoek loetoetnja boeat berterima kasih pada Toehan jang begitoe banjak orang Tionghoa sedikitnja ada satoe jang seperti Hok Hoei siansing.
-Soedah loe djangan tjoba aboien mata goea! Loe kira apa goea tida kenal abis sama loe? Loe si matjem apa! Asal ada doeit, maski goea bilang kajoe bisa karatan, loe tentoe maen owee-owee sadja! Lebi baek loe sekarang kasih taoe bagimana kesoedah’an dari loe poenja perdjalanan, boeat mana goea soedah moesti rogo sakoe tida sedikit! Membentak Hok Hoei siansing, sembari ini kali poen tida loepa boeat tjaboet katja-matanja jang gelasnja digosok poelang-pergi, seperti biasanja djika ia hendak kasih indruk.
-Menoeroet Tauwke poenja prentah, owee soedah koendjoengi banjak orang jang tauwke kira nanti kasih soearanja boeat pemilihan Volksraad ini. Dan mereka semoea kasih sanggoepan, tauwke boleh liat belakang kali sadja bagimana kesoedah’annja! Djawab Kek Sim jang njalinja seperti terbang koetika liat matanja sang madjikan zonder katja-mata.
-Liat belakang kali! Apa jang dia orang maksoedken? Itoe orang² goblok! Apa dikira goea zonder dia tida bisa masoek Volksraad? Goea poenja nama toch tjoekoep terkenal dan goea bisa masoek keloear disemoea departement, seperti belon pernah ada orang Tionghoa bisa berboeat! Kaloe goea sampe soeroeh loe koeliling, ini kan tjoema boeat mentjoekoepin per-adat-an sadja. Tapi sekali-kali djangan dianggep seperti goea perloe sama soearanja dia orang! Hok Hoei tjoekoep terkenal, tjoekoep tinggi kedoedoekannja, hingga tida perloe moesti koeliling boeat tee-yan soeara! Loe ngerti? Abis, apa loe tida tanja, apa dia orang soedah batja pridato² jang goea bikin di banjak tempat? Bagimana dia poenja pikiran? Tanja Hok Hoei siansing.
-Apa owee boleh bitjara teroes terang, tauwke? Tanja Kek Sim dengen ogah²an.
-Abis apa loe kira goea soeka boewang oewang tida sedikit boeat loe plesir dan kombali dengen bawa dongengan! Djawab Hok Hoei siansing dengen sengit.
-Ada djoega, tauwke, jang owee samperin dan adjak omong tentang pemilihan jang bakal dateng. Tapi owee sengadja tida maoe bilang jang owee ada orangnja tauwke. Maksoed owee soepaia dia bitjara teroes terang! Begitoelah si Kek Sim moelai menoetoer.
-Hm! Taktiek jang begitoe ada tjerdik djoega. Memang dalem soal politiek loe selamanja djangan loepa boeat goenaken diplomatiek! Menasehatken Hok Hoei siansing, jang berdehem tida berentinja, saking girangnja jang ia dengen sekaligoes bisa oetjapken itoe perkata`an taktiek, politiek, diplomatiek!
-Tapi………… tapi, tauwke. Djoestroe kerna itoe taktiek, maka owee denger pengoetjapan² jang tida baek djika owee oelangken didepan tauwke! Katanja Kek Sim jang mendjadi serba salah.
-Tida baek? Apanja jang tida baek? Apa goea dimaki atawa di tjelah? Tapi toch loe taoe djoega, bahwa semoea orang besar tida loepoet dari tjelahan dan makian, sedeng nabi poen ada jang tida setoedjoe, kata Hok Hoei siansing.
-Tapi tida ada satoepoen jang nati bilang nabi itoe bisa menipoe dan mendjoesta, tauwke, sedeng dalem tauwke poenja hal, jang tida taoe bahwa owee ini orangnja tauwke, lantas sadja bilang : „O, si Hok Hoei! Ah, dia tjoema moeloetnja sadja, 'nko. Tjinta bangsa, tjinta tongpauw, sebentar maoe djadi Blanda, lebih dari Blandanja sendiri, sebentar djadi Indonesier, sebentar merah, sebentar poetih! Omong kosong semoea!”
-Wat? Hm! Tjoba loe tjatet namanja itoe orang jang begitoe koerang adjar! Pertjoema kaloe begitoe djaoeh² soedah maen kirimin dia orang doekoe, ramboetan, goea kirimin kartjis, goea soembang boenga! En, toch hatsilnja begini matjem. Tapi apa loe tida kasih taoe sama dia orang, goea, dengen goea poenja perhoeboengan sama kalangan pemerentah Blanda sampe tingkat paling tinggi, toch bisa berboeat banjak sekali boeat tjina-tjina?
-Owee soedah bilang begitoe tauwke. Tapi dia orang boekan sadja tida pertjaja, mala sebaliknja tanja apa betoel jang tauwke di medja-toelis-nja poenja doea telefoon, satoe bener disamboeng sama kantor telefoon, tapi jang laen kawatnja boentoeng dibawah medja. Perloenja tjoema boeat djoeal gertak sadja jang tauwke kebetoelan lagi bitjara sama directuer ini dan directuer itoe. Padahal jang denger tauwke poenja omongan satoe semoet poen tida! Taktiek sematjem begitoe, katanja orang soedah lama kenal, hingga owee sendiri sampe maloe waktoe denger tauwke di djengkin begitoe!
Mendenger itoe verslag dari si Kek Sim, kendati Hok Hoei siansing poenja koelit moeka tebelnja boekan maen, kerna disepandjangnja begitoe banjak taon dipopok sama tjatjian dari mereka jang kenal abis moeslihatnja, toch daon koepingnja mendjadi merah dadaoe djoega sembari toendoekin kepalanja, kedengeran Hok Hoei siansing menggerendeng:
-En, toch 500 roepia goea soedah boewang boeat soeroeh ini kalde koeliling!
Dan selagi si Kek Sim hendak teroeskan penoetoerannja, mendadak djongosnja Hok Hoei masoek dan kasih taoe jang diloear ada menoenggoe satoe tetamoe dari Djawa Wetan, jang kartjis-namanja ia persembahken diatas nenampan.
Zonder bilang satoe patah Hok Hoei siansing ambil itoe kartjis dan sesoedahnja batja namanja, ia oendjoeken itoe pada si Kek Sim.
-Loe kenal ini? Tanja Hok Hoei siansing.
-Tida, tauwke, tapi namanja owee kenal. Di Djawa Wetan ia ada satoe orang jang berpengaroeh, tjoema orangnja rada bodoh dan pengaroehnja tjoma didasarken atas halnja dia poenja banjak doeit!
-Zoo! Bagoes, dan goea nanti goenaken ia sebage bekakas. Loe taoe moesti berboeat apa boekan?
Si Kek Sim manggoet, sedeng pembitjara’an jang dilakoeken oleh mereka memang sengadja dibikin pelan, agar si djongos tida toeroet dengerken. Kemoedian, dengen satoe kali manggoet, Hok Hoei siansing titahken itoe boedjang oendang si tetamoe masoek, sedeeng keada’an dalem kantorannja itoe orang besar djoega mendadak beroebah, Kek Sim boeroe² ambil setoempoek soerat² jang ia taro disampingnja Hok Hoei siansing, jang medja toelisnja di hiasin oleh boekoe² tebel.
-Ini moesti ditaro mana tauwke? Tanja Kek Sim dengen goegoep, kerna diatasnja medja-toelis, precies didepannja krosi, ada terletak potretnja satoe njonja jang……… Nou ja, itoe boekan mendjadi pembatja dan saja poenja oeroesan.
-Hoes! Loe simpen sadja doeloe dalem sakoe loe. Tapi awas, djangan sampe orang taoe, nanti goea bisa riboet lagi! Kata Hok Hoei siansing jang kamoedian boeroe² angkat si telefoon boentoeng. Dan waktoenja itoe tetamoe masoek, kedengeran Hok Hoei siansing ketawa bekakakan:
-O, natuurlijk! Ja, owee toch soedah kasih tae sama siansing, itoe perkara owee soedah bitjaraken sama directuer departement Economische Zaken. Bole djadi nanti sore owee bisa ketemoe toean directuer di kamar-bola dan owee maoe audientie sama toean-besar. Djadi siansing tida oesah koeatir itoe oeroesan! O, tida oesa, siansing! Owee soedah bersoekoer jang owee bisa goenaken owee poenja pengaroeh boeat keperloeannja lan tongpauw seoemoemnja!
Kemoedia pembitjara`an telefoon itoe ditoetoep dan sembari kasih liat senjoemnja jang paling manis ke djoeroesan si tetamoe, Hok Hoei siansing bikin gerakan sama tangannja boeat silahken ambil tempat doedoek doeloe. Kek Sim, jang memang soedah biasa dengen pertoendjoekan begitoe, kemoedian mendatengin dengen beberapa soerat jang alamatnja sengadja ia oetjapken soepaia si tetamoe djoega toeroet denger:
-Department Economische Zaken, departement Justitie voorzitter Volksraad en Waterstaat. Soerat jang aken dikirim pada Staten Generaal di Nederland belon djalan!
-O, ja? Hm! En toch itoe ada perloe sekali. Tjoba nanti sore moesti disediaken ja!
Sesoedah boewang ini tingkah, baroe Hok Hoei siansing samperin tetamoenja dengen hati sembajang soepaia sedikitnja ini orang bisa digoenaken sebage bekakas boeat sokong kedoedoekannja Hok Hoei siansing jang makin hari olehnja dirasaken makin mendojong.

TJAMBOEK BERDOERI

DALAI LAMA. (Seri CHH)

6 Agoestoes 1938.
Siansing Kan Hok Hoei alias toean Hendriek Hendriek Kan, Chung Hua Hui poenja Dalai Lama, pada besok tanggal 7 ini boelan aken bitjara Sianghwee Semarang dihadepan angota² Tionghoa dari locale raden dan wijkmeesters.
Kaperloean apa jang menjoeroeng siansing Kan Hok Hoei alias toean Hendriek Hendriek Kan oentoek bitjara dipertemoean terseboet, tida laen ada………
Ah, juist, pembatja! Boekankah tida lama lagi aken dateng waktoenja boeat kita poenja dubbele Hendrik (de geweldige) moesti tinggalken krosinja di apa jang dinamaken Dewan Rajat?
Dan djoestroe itoe krosi jang siansing Kan Hok Hoei alias Hendriek Hendriek Kan terlampaoe tjintaken, sampe pikiran bakal berpisahan sadja soedah bisa bikin aer-matanja sang datoek mengoetjoer deres sekali.
Bisa di mengerti jang antara Dalai Lama kita dan krosi terseboet terdapet satoe perhoeboengan ketjintaan jang soesah ditjaboet akarnja. Tida koerang dari 20 taon lamanja, teroes meneroes, Dalai Lama kita bersamedhi diatas krosi itoe sampe tempat doedoeknja (dari itoe krosi natuurlijk(*dengen sendirinja)) mendjadi keripoet seperti koelitnja djeroek keprok jang soedah keliwat mateng, tapi mati²an tida maoe djatoh dari tangkenja. 20 taon ada tempo jang tjoekoep lama boeat adjar kalde jang paling goblok bisa mendjoget djoega. Dengen ini tentoe tida hendak dibilang jang siansing Kan Hok Hoei alias Hendriek Hendriek Kan dipersamaken dengen kalde.
O, tida! Siapa jang brani kasih itoe gelijkstelling (*pesamaan)? Siansing Kan Hok Hoei alias toean Hendriek Hendriek Kan, satoe orang terhormat, lid Volksraad, Bondsvoorzitter Chung Hua Hui, candidaat Edeleer Raad van Indië (tjoema toenggoe loeloesnja sadja), pemoeka dan pemimpin jang mendjadi djempolnja segala djempolan pemoeka dan pemimpin, satoe hamba jang maha setia dari keradjaan Olanda, satoe Nationalist zonder ada bandingannja, satoe Indonesier bij gelegenheid, satoe genie, masa moestika jang, begitoe ada jang brani persamaken (maski dalem pikiran sadja) dengen satoe kalde?
Itoe toch ada terlaloe gila, boekan?
Apa lagi soearanja itoe bloemlezing(*Boenga rampai) dari pikiran² Tionghoa toch tida bisa disamaken dengen gebalk dari kalde jang sederhana?
Bitjara pasal soeara, apa pembatja taoe, jang siansing Kan Hok Hoei alias toean Hendriek Hendriek Kan oleh alam dikoerniaken dengen tiga stel soeara jang ia bisa tjopot dan pasang sama gampangnja seperti saja tjopot dan pasang gigi saja jang palsoe? Dan pemasangan dan pentjopotan soeara itoe datoek kita selamanja diimbangken sama keada`an. Kalaoe oepama ia lagi beladjar boeat loeloes sebagi Edeleer Raad van Indie, toean Hendriek Hendriek Kan kasih masoek dalem tenggorokannja soeara jang meloeloe bisa kasih denger lagoe „Wilhelmus”.
Bila satoe waktoe ia moesti tarik soeara boeat njanjiken rindoe hatinja pada „Tongpauw jang sanget ditjintaken” enz, si „Wilhemus” dikantongin dan „Kuo Ko” ditelan. Dan kaloe moesti berdeket pada „pihak sini”?
Oh, itoe perkara gampang! Orang biasa boleh djadi soedah poesing kepalanja, tapi boeat satoe genie(*bakat loear biasa) sebagi Dalai Lama kita, perkara itoe ada sipil(**moedah) sekali, sama sipilnja seperti boeat satoe toekang soenglap jang moesti kasih keloear telor ajam dari dalem bidji matanja.
Si „Kuo KO” ditaroh dalem sakoe tjelananja dan sebagi gantinja “Indonesia Raja” disoeroeh bersarang dibelakang kòlò-mendjingnja! En klaar is Hendrik!
Kerna adanja ini berkah Alam, maka bisa dimengerti jang seringkali, bial naek dipanggoeng, baek jang dibriken di dalem gedong Volksraad, maoepoen jang diloearnja, pendenger²nja pada saling tjelingoekan, kerna tida abis pikir tjara bagimana satoe orang bisa mempoenjain tiga stel soeara.
Tapi boeat mereka jang kenal baek pada itoe djago toea, itoe tiga matjem soeara tida mengheranken poela. Paling banjak ia orang angkat poendak dan menggerendeng : „Een oude vos verliest, wel zijm haren, maar………” enz.
Dari apa jang ditoetoerken diatas, bisalah kiranja pembatja bajangken bagimana penting adanja siansing Kan Hok Hoei alias toean Hendriek Hendriek Kan boeat kemadjoean bangsa kita choesoesnja dan boeat doenia seoemoemnja.
Sebagi sobat karibnja, saja rasa bisa bajangken bagimana Dalai Lama kita aken moelai angkat bitjara di hadepan anggota locale raden dan wijkmeester jang dipikat soearanja didalem gedong Sianghwee di Semarang. Pemikatan soeara itoe perloe soedah dilakoeken djaoeh² hari, kerna pemilihan Volkstraad djoega soedah hampir moentjoel.
Berhoeboeng sama halnja sekarang soedah mendjadi sematjem mode boeat tiap² orang Tionghoa angkat dirinja mendjadi Nasionalist, maka tentoe sadja siansing Kan Hok Hoei alias toean Hendriek Hendriek Kan tida brani tjoema telen sadja ia poenja soeara „Wilhelmus” tapi sebaliknja boeat meloeloe kasih pengoetaraan via soeara „Kuo Ko”, ini hal poen ia soengkan ia lakoeken. Boekankah diantara pendenger²nja terdapet djoega golongan wijkmeester jang boleh dianggep mendjadi setengah ambtenaar dari Kandjeng Goebernemen? Maka itoe, siansing Kan Hok Hoei alias toean Hendriek Hendriek Kan boeat ini kali pasang stemband(*tali soeara) setengah „Wilhelmus” dan setengah „Kuo Ko”. Soepaia mentjoekoepin permintaan mendjadi nasionalist dan berbarengan dengen itoe djoega oendjoeken jang ia teroes tinggal setia di bawah doelinja dari Jang Dipertoean di sini.
Siansing Kan Hok Hoei alias toean Hendriek Hendriek Kan kira² aken bitjara begini:
-Toean² jang terhormat sebelon saja bitjara lebih djaoeh, saja minta dengen hormat toean² sekalian soeka berdiri tiga minuut boeat memperingati soedara² kita di Tiongkok, jang soedah mendjadi korban bahaja perang.
Sembari toenggoe abisnja itoe tiga minuut, menoeroet kebiasaannja, siansing Kan Hok Hoei alias toean Hendriek Hendriek Kan aken tjopot sebentar katja-matanja, jang gelasnja ia gosok pergi-dateng. Ini boeat kasih indruk, sebab saking kerasnja ia goenaken pikirannja sampe kringetnja mengoetjoer keloear dan bikin boetek gelas katja-matanja itoe.
Dan bila itoe tempo tiga minuut soedah liwat, Dalai Lama kita landjoetken:
-Toean². Tadi waktoe kita orang berdiam tiga minuut saja rasanja ampir tida tahan. Boekan kerna tjape berdiri, tapi sebab menginget saoedara² kita di tanah leloehoer, jang ini waktoe soedah dibakar oleh api peperangan jang berkobar besar sekali.
-Dan ada menggirangken hati saja meliat bagimana Tongpauw kita di Lam Yang sini, dengen tida ada satoe jang maoe ketinggalan, masing² soedah pada angsoerken tanaganja, soedah pada soembangken oewangnja oentoek ringanken sedikit kesengsaraan jang dipikoel oleh saoedara² kita di kita poenja Tjouwkok.
-Poen Chung Hua Hui dari mana sadja ada itoe kehormatan boeat mendjadi Bondvoorzitternja, toeroet angsoerken tenaganja. Dan boekan tjoema boeat toeloeng saoedara² kita di Tiongkok sadja, tapi djoega Chung Hua Hui selaloe goeloeng tanganja. Betoel Chung Hua Hui boekan pemerentah, tapi kita orang berdaja sebisa-bisanja boeat toeloeng Tongpauw kita jang kita ingin deradjat dan kedoedoekannja bisa terangkat keatas.
-O, kaloe saja liat dan pikirin nasib bangsa kita, jang djoega mendjadi saoedara²nja toean² sekalian jang terhormat, saja rasa antjoer hati saja. (bitjara sampe disini, siansing Kan Hok Hoei alias toean Hedriek Hendriek Kan boeka poela katja-matanja dan soesoet ia poenja alis) kadang kali Chung Hua Hui sampe tida bisa tidoer, mikirin itoe semoea nasib jang gelap goelita, maka itoe, seperti jang barangkali toean² djoega taoe, dalem gedong Volksraad saja tida loepa saben kali kasih denger soeara² saja boeat minta perbaekan. Tapi apa jang saja, satoe orang bisa berboeat? Apa jang Chung Hua Hui, dari mana saja mendapet kehormatan boeat diangkat sebage Bondvoorzitter, bisa berboeat, kaloe saja dan Chung Hua Hui tida dapet bantoean dari toean² sekalian? Chung Hua Hui bisa berboeat banjak, tapi publiek Tionghoa berame-rame moesti toendjang dan berdiri dibelakang kita.
-Dalem pembitjaraan saja sama toean² direktuer dari departement² di Batavia, saja djoega dapet anggepan, gerakan kita kandas. Kerna perkoempoelan politiek kita tida poenja, katjoeali Chung Hua Hui satoe. Tapi kaloe maoe diminta Chung Hua Hui bisa berboeat banjak, tiap² orang Tionghoa moesti berdiri di belakang Chung Hua Hui dan kasih dorongan pada kita. Dan kaloe bantoean itoe soedah dikasih, nanti Chung Hua Hui tentoe bisa boektiken jang dia tjoema ada perkoempoelan Tionghoa jang berhaleoan politiek jang satoe²nja jang bisa toeloeng nasibnja Tongpauw sekalian, sebab Chung Hua Hui sadja jang bisa poenja hoeboengan rapet sama toean² besar dari kalangan pamarentah. Dan soepaia soeara jang saja bawa di gedong Volksraad atawa kaloe saja bitjara sama toean² direktuer dari departement² di Batavia, bisa ada pengaroehnja, tida tjoekoep saja bawa sadja nama Chung Hua Hui, tapi Chung Hua Hui baroe ada artinja bila dapet sokongan sepenoehnja dari toean² sekalian.
-Djoega dalem perdjalanan jang saja bikin ke Djawa Wetan, saja kasih seroepa andjoeran pada publiek kita, soepaia mereka berame-rame toendjang Chung Hua Hui, jang ada perkoempoelan politiek bangsa Tionghoa jang satoe²nja jang berpengaroeh. Tapi soedah saja kataken beroelang-oelang, publiek Tionghoa haroes mengetahoein, dimana adanja fihak jang bisa belaken kepentingannja sampe dilapisan pemerentahan jang paling tinggi.
(roepanja itoe perkata`an “lapisan pemerentah jang paling tinggi” oleh spreker dianggep soeorep sekali boeat gambarken angen²nja, kerna sesoedahnja berenti sebentar ia landjoetken:)
-Sampe dilapisan paling tinggi Chung Hua Hui bisa dateng, tapi boeat bisa sampeken maksoednja, kita perloe dapet toendjangan dari semoea orang Tionghoa, soepaia tenaga kita djangan terpentjar disana-sini, tapi terkoelpoel didalem satoe tangan.
-Toean² haroes teroes pertjaja pada Chung Hua Hui jang aken toentoen Tongpauw ke djalan jang terang. Poen boeat toean² wijkmeester. Chung Hua Hui djoega soedah beklai, seperti jang toean² bisa ikoetin pembitjaraan saja di dalem Volksraad. Boeka begitoe sadja, djoega pada direktuer departement Binnenlandsch Bestuur, jang saja kenal baek, saja bitjara. Maka itoe, kaloe toean² toendjang Chung Hua Hui, berarti toean² toendjang kepentingan toean² sendiri.
-Dan kaloe ada toean² jang hendak tanja ini atawa itoe, saja sanggoep kasih djawaban dan nanti kaloe perloe saja bisa teroes samboeng sama pembesar² di Batavia.
Saja brani pastiken jang tida ada satoe pembatja kita jang nanti aken bilang bahwa pridatonja siansing Kan Hok Hoei alias toean Hendriek Hendriek Kan ada terlaloe betjoes.
Seselan demikian bisa dimengerti kerna memang djoega dalem kalangan Chung Hua Hui spreker jang betjoes tida ada. Apa jang dikemoekaken dihadepan Tongpauw jang tertjinta biasanja tjoema rintihan soepaia „publiek Tionghoa rata² toendjang Chung Hua Hui”
Sikep ini ada aneh djoega boeat „perkoempoelan politiek Tionghoa jang satoe²nja” dan jang katanja ada mempoenjai satoe brapa banjak contact sama departement ini departement itoe.
Ada baeknja djoega bila seabisnja siansing Kan Hok Hoei alias toean Hendriek Hendriek Kan bitjara di itoe pertemoean di Sianghwee Semarang, salah satoe pendenger-nja tjoba tanja dimana djeboesnja itoe Vakschool jang siansing Kan Hok Hoei alias toean Hendriek Hendriek Kan djandjiken disatoe pertemoean di Bandoeng pada ampir doea taon berselang?
Djangan tjoema maen pentjak dengen alesan kosong, seperti masih dibitjaraken sama direktuer departement ini atawa itoe.
Roepanja boeat bantoe lahirken itoe baji Vakschool hingga sekarang belon bisa diketemoeken doekoennja, kendati siansing Kan Hok Hoei alias toean Hendriek Hendriek Kan gentajangan masoek keloear setaoe di departement mana dan soedah bikin pembitjaraan sama „pembesar² dari kalangan pemerentahan dari lapisan paling atas”
Siansing Kan Hok Hoei alias toean Hendriek Hendriek Kan brikoet Chung Hua Hui-nja djangan loepa Vakschool jang didjandjiken itoe tida bisa diwoedjoetken bila mereka tjoema bisa maen djoeal humbug meloeloe.
Menoeroet permintaan jang disampeken oleh sobat²nja, kabarnja siansing Kan Hok Hoei alias toean Hendriek Hendriek Kan minta sanget soepaia selandjoetnja, bila orang bitjaraken atawa toelis tentang ia, djangan pake lagi itoe seboetan siansing atawa toean. Hanja soedah tjoekoep djika orang bilang sadja Kan, atawa Hok Hoei, atawa H.H. Kan, atawa “onze Hendrik”.
Sebabnja?
Orang toch djoega tida bitjara atawa toelis siansing Chiang Kai Shek, toean Hitler, toean Mussolini enz?

TJAMBOEK BERDOERI.

Djikak Ke Kong Ya (seri CHH)

13 Agoestoes 1938. DJIKAK KĔ KONG YA.

Sebab apa Chung Hua Hui Java sedari doeloe hingga sekarang tida disoeka oleh 90 pCt dari publiek Tionghoa?
Djawabannja ada gampang sadja. Itoe perasaan disebabken oleh sikep tengik dari sebagian besar anggota²nja sendiri. Itoe djoeloekan jang tadinja dimaksoedken oleh sebage nama pojokan meloeloe, itoe djoeloekan „Kaoem Packard” roepanja soedah pengaroehin kepala jang tida koeat begitoe roepa, hingga menjebabken terlahirnja itoe pikiran keliroe, seolah-olah mereka itoe semoea bener² masoek golongan tonnair, sedikitnja. Padahal keadaan jang sedjatinja sama sadja seperti mereka jang ditjap sebage „Kaoem Grobak”. Malah lebih tjilaka lagi saking inginnja paksa diri agar bisa terbitken doega`an seolah-olah ia djoega orang masoek golongan kaoem hartawan, kendati menoeroet oekoerannja si boeta baroe melek. Seperti djoega tida semoea orang Chung Hua Hui kajah, poen tida semoea orang boekan Chung Hua Hui ada djembel. Oempama di Soerabaia paling banjak tjoema ada beberapa orang sadja jang boleh dianggep hartawan soenggoehan. Tapi de rest, diloearnja sadja menterang, dibagian dalem…………
Djika diantara mereka jang soeka djoeal kesombongan tengik begitoe, dibikinken balans dari milik dan oetangnja, ampir rata² soedah mateng boeat dinjataken failliet. Kaloe activa soedah berada djaoeh dibawahnja passiva, kemana lagi parannja?
En toch itoe orang² kaoem packard masih djoega doeal laga dengen roemah jang tertindih hipotheek satoe dalem verband jang keberapa; masih sombongken autonja jang tjitjilan tiap boelan tjoema bisa diloenasken dengen djalan kerasin tali-pinggang dan keringken tenggorokan. Lebih gila lagi mereka jang masoek golongan koeli, sama koelinja sebage saja, en toch bisa berlakoe pl`mpang-pl`mpoeng, percies sedikitnja ia orang seret fabriek goela di belakangnja. Meloeloe lantaran masoek golongan „kaoem terpeladjar, hartawan, ternama”, seperti jang katanja tjoema melingkoengi Chung Hua Hui.
Dan djoesteroe itoe opgeblazen gedoe dari anggota²nja jang bikin Chung Hua Hui timboelken orang poenja rasa ‘mblenek. Apalagi kaloe datoek²nja (seperti itoe tjabang atas Kan Hok Hoei siansing) tjoema pande djoeal humbug meloeloe, selagi berdikir pasal “tjintanja pada Tongpauw kita” dan laen² pikatan poela. Dalem waktoe begitoe biasanja datoek² terseboet berlakoe rojaal sekali sama djandjian adaken Vakschool dan sebagenja. Tapi bila beroelang kali didesek oentoek oedjoetken itoe sanggoepan adaken Vakschool, lantas segala matjem department di gotong kedepan „direktuer ini masih repot”, “toean besar” itoe lagi berpergian. Antero „pembesar² kalangan pemerentah dari lapisan paling tinggi” di mobilisier oentoek toeloeng mereka poenja figuur jang hendak, diblodjotin” kedoknja. Apakah pembatja masih perloe tanja lagi, sebab apa Chung Hua Hui tida disoeka? Ketjoeali oleh golongan djikak ke Kong Ya. Tapi mereka ini boleh tida oesah dikasi masoek dalem itoengan.
Kendati dipake sebage toetoep radiator atawa gandjelan dommekracht, tida apa, asal sadja bisa keterima dalem golongan bekakas auto packard, toedjoeh toeroenan rasanja soedah poeas.
Tapi maski tjoema dianggep sebage toetoep radiator atawa gandjelan dommekracht sadja, toch laganja boekan maen. Seperti jang bisa diliat dalem pemilihan gemeenteraad pada hari selasa jang laloe, dimana itoe monsters zonder waarde dari Chung Hua Hui membawa sikep seolah-olah mereka itoe boekannja kantongin soerat gade dan soerat antjeman bajar oetang, tapi sedikitnja soerat aandeel aniem. Saja ambil sadja beberapa tjontoh dari itoe sekean banjak djikak ke Kong Ya.
Pada beberapa taon berselang koetika ia masih mendjadi tjina benedenstad, itoe toetoepnja radiator tida banjak betingkah. Tiap hari ia biasa bergelandangan dalem roemah petaknja, dengen meloeloe pake tjelana boentoeng, sedeng bagean toeboehnja, seatas poeser dibiarken kedjemoer matahari. Kalo hari soedah mendjadi petang dan ia poenja satoe atawa doea auto gerobak pranti anter dan angkoet barang² soedah pada poelang dikandangnja baroe itoe tjina benedenstad pake pakean jang bikin ia mirip sama manoesia biasa jang soedah sopan.
Disepandjangnja itoe taon si tjina benedenstad „bintangnja” lagi naek; ia bisa „oeroes” marhoem thauwkenja poenja peroesahaan begitoe roepa, sampe achirnja itoe tjina benedenstad bisa melangkring di bovenstad dan dapet seboetan toean. Dan tentoe sadja lantas masoek Chung Hua Hui, soepaia bisa toeroet ketjipratan gelaran „kaoem packard” maski asalnja itoe djoeloekan Packard tjoema beroepa nama pojokan meloeloe.
Dari roemah petak lontjat keroemah gedong; dari tida mempoenjai arti apa², ketjoeali kepandean „mengoeroes” mendadak di bombardeer sebage orang jang masoek golongan intellect, hartawan, ternama, enz² (maski menoeroet oekoerannja si boeta baroe melek), tentoe sadja ia dihinggapin oleh penjakitnja semoea parvenu, si kajah baroe.
Dan koetika ia diadjak ke Kong Ya dateng di stembus, laganja seperti djoega itoe pemilih² dianggep sebage kontrakan deli sedeng ia berlaga mendjadi mandor besarnja. Ini kodok jang berlaga kerbo tadinja kira bisa kasih indruk dengen ia poenja opgeblazen gedoe; tida taoe nja ia poenja pringas-pringis tjoema disamboet sama grendengan „O, koei” hingga boeroe² ia ngiprit pergi.
Laen exemplaar lagi beroepa klerk van plus-minus kauw-tjap-toen tiap boelan. Tapi ia dateng di stembus dengen membawa laga seolah gadjinja burgermeester jang dikantongin.
Saja bisa merasa kesian pada itoe armzalige broeder jang mati²an hendak pasang dirinja sebage gandjelan dommkracht auto packard. Koetika ia lagi andjoerin satoe ‘empe boeat toch pilih sadja candidaat Chung Hua Hui, ini orang toewa, jang soedah kenjang makan garem doenia, dengen enak mendjawab:
-Ah, nip! Owee kaoem koeli, seperti djoega nip sendiri. Owee pilih jang sepantaran dengen owee. Orang Chung Hua Hui itoe tjoeman maoe doedoek tjari nama sadja, kan gaga-kakoe bisa seboet dirinja lid gemeente! Tapi kaloe soedah doedoek, wa! Djangan harep bisa gampang ditanja; apalagi diminta toeloeng atoer oeroesan gemeente. Soedah bagoes dia orang maoe djandji atoer, maski djeboesnja nanti omong kosong sadja!
Si gandjelan dommkracht ngelojor pergi.
Ada lagi laen monster zonder waarde jang djadi treeplank dari itoe auto packard jang kesohor, kerna oemoemnja tiap auto poenja doea treeplank, poen ini kali ada sepasang sentrogantol begitoe mereka, dengen pake pakean confrectie moerah, bolak-balik diroewangan pemilihan, sembari tolak pinggang dan laganja repot boekan maen, sebentar dateng deket medja pemilihan, saat lagi keloear poela.
-Wa, waarom mijn baas belon dateng? Nanti neh soedah ada veel menschen, beroerd seg! Moet djedjel-djedjelan!
Meliat itoe ketengikan saja poenja tangan rasanja seperti apa jang dibilang „semoeten” dan selagi saja hendak oedji apa bener toelang-iga dari pinggang jang ditolak pergi-dateng begitoe betoel dibikin dari beton meloeloe, itoe doea kampret soedah terbang pergi. Boleh djadi boeat repot sama „mijn baas”.
Chung Hua Hui sampe kiamat tida aken disoeka kaloe orang² jang soeka pl`mpang-pl`mpoeng seperti koewee limpang-limpoeng jang koerang adonannja. Tapi sebelonnja si laskar bisa diadjar taoe diri, lebih doeloe datoek²nja Chung Hua Hui moesti boewang itoe anggepan kosong, seolah-olah mereka itoe meloeloe terdiri dari orang jang terpeladjar, hartawan, ternama enz².
Kerna itoe opgeblazen gedoe jang misslijk toeroen dari atas kebawah.
Dan teroetama djangan soeka djoeal omong kosong dengen djandjian Vakschool dan laen² obrolan, poen doengenan pasal department ini dan itoe serta perhoeboengan sama pembesar² kalangan pamarentah dan lapisan paling tinggi baek disimpen dalem archief sadja, sebab soedah tida lakoe lagi.
Boeat tjegah djangan pembatja kira jang ini pridato ditoelis meloeloe tersoeroeng oleh prasaan opportunisme terhadep Chung Hua Hui, saja terangken, saja boekan anggota P.T.I. maoepoen lid S.B.T dan djoega boekan lid Comite Pranakan Asia.
Tapi saja ingin kasih mengerti „Kaoem Packard” tida ada, hanja kita semoea terdiri dari tiang alit sadja.
TJAMBOEK BERDOERI.

Si Swee Siauw dan Tjin Tjay Hwee-nja (III-TAMAT)

Saptoe 2 Apriel 1938. (III)

Kerna soedah djandji aken bersama-sama pergi ke satoe vergadering dari satoe perkoempoelan, dari mana sobat saja, si Swee Siauw, mendjadi voorziter, maka pada semalem saja dateng diroemahnja. Sesampenja saja disana di roewangan depan saja tiba ada tampak barang satoepoen manoesia. Atas ketokan saja, si Swee Siauw achirnja nondjolken kepalanja di “pintoe singapoor”. Tangan kanannja bikin gerakan boeat artiken saja soeroe doedoek doeloe, kamoedian dengen djempolnja oendjoekan apa² kedjoeroesan belakangnja, sedeng djari-teloendjoeknja dari tangan kirinja ditempelken diatas bibir.

Selagi saja hendak tanja keterangan, arti dari itoe semoea komedie-bisoe, si Swee Siauw tarik kombali kepalanja dan berdjalan masoek. Saja tjoema bisa menoenggoe sadja.

Mendadak saja terpradjat kerna dari dalem kedengeran soeara riboet, dibarengin sama pitjahnja barang dari beling.

-Soedah, loe selamanja bisa tjari alesan adja! Pergadring, koempoelan, moesti ngatoer ini, ngatoer itoe! Tapi ngatoer dongko loe deweh sih 'ndah entos!

Ini soeara keren dibarengin sama gebrakan pintoe dan setaoe piring atawa tjangkir jang dioedji kekoeatannja sama djoebin.

Soedah tida bisa salah lagi pasti si Swee Siauw, jang terkenal sebagi kia-bŏ alias takoet bini lagi “disrobi” oleh njonjanja.

-Sekarang loe maoe pegi mana lagi? Neh diadjah pegi nganterno goea pegi toko Aurora, pegi pasar Toendjoengan, selamanja loe aras-arasen. Ada adja pasan alesannja, sing masoek angin, sing greges, sing kademen! Tapi neh diparanni kontjonja, la ‘mboh maoe bongkō, loe sih rasanja maoe teeken appēl. Dasar roepaloe djadi laking orang 'ndah entos!

-Nanti tah, na! djadi orang itoe sing sabar. Tjoba na………

-Na, na apanja? Neh goea soedah morang-moring, loe pake ngambih² ati, sing nona, sing apa! Goea boekan nona loe! Orang embong itoe, loo, panggilen nona! (krompijang! Kombali satoe piring naar de maan!).

-Tapi ini kali goenggoean Vergadering perloe, sebab……

-Goea perdoeli apa sama pergadring loe? Tjoba matjem loe boekan laki goea, babah loe pergadring siang malem, goea poesing apa? Loe kira apa goea kesenengen djadi bodjo loe? Soedah 'ndah bisa ngenah-ngenahno, pake makan ati! Tjoba loe liah bodjonja ‘ntjik Giok itoe! Dinaekno montor, diliahno biskoop, kraboenja adja lebi gedee sama mata loe!

-Tapi orang itoe kan masing² bawa redjekinja sendiri! Begitoelah kedengeran si Swee Siauw bitjara rada sengit, kerna biarpoen begimana djoega, sebage lelaki sedjati si Swee Siauw sedikitnja mendongkol djika istri sendiri “olok” dan bandingin dirinja dengen laen lelaki.

-Soedah, loe dimoeka goea djangan pake kata masing²! Goea boekan pergadring loe! Redjeki! Selamanja loe alesan redjeki neh goea njonja ini, njonja itoe saben godek kepijoer berliannja! Loe ini soedah sial, pake 'ndah bisa njintai orang wedoh! Tjoba katao lagi masing² gitoe! Nanti neh 'ndah goea sirem sama aer gelas ini, loe djangan ngakoe goea djadi bodjo loe!

Roepanja itoe antjeman bener dilakoeken, kerna saja denger djatonja krosi jang bole djadi ketoebroek tergoeling oleh kerna si Swee Siauw boeroe² lontjat moendoer.

-Ja, ja tah soedah! Tapi, ssst…! Djangan rame²! Loear ada sianoe!

-Goea perdoeli apa, loear ada djrangkong sekali, goea 'ndah ambil poesing! Djangan lagi tjoema ‘ntjik Anoe. Bisanja dateng kemari, lakinja orang didjah ngelompro! Dia sih boedjang, tapi matjem loe sing soedah poenja bodjo, soedah djadinja bapanja orang, kan moestinja bisa grajang djitok loe!

Wa! Sekali ini tjialat saja! Roepanja ‘nsoo Swee Siauw bener² ada satoe matjan betina! Masa, sedeng ia taoe jang ‘ntjik Anoe (saja sendiri) ada didepan dan dengen begitoe mendjadi kepaksa toeroet dengerken itoe bedsermoen openbaar, toch ia tida segan boeat labrak saja, kendati via si Swee Siauw. Selagi saja hendak berdiri boeat liat katja dari tempat gantoengan topi saking kepinginnja taoe begimana roepanja satoe djrangkong, atawa kombali saja doedoek poela. Kerna dari dalem kedengeran pintoe lemari di gebrak.

-Loe neh paksa maoe pegi, 'ndah oesah pake salin djas! Apa loe pegi pergadring, apa pegi soehian, koh apake maoe djoeal bagoes! Dateng djok, mandi salinan pegi lagi! Apa goea ini loe anggep orang-orangan apa bajangan?

-Moso, lawon nona deweh sing tjari² adja!

-Apa loe bilang? Goea tjari²? Neh 'ndah loe sing saben² kedja goea moentap, sapa lagi? Sediloeh pergadring, sediloeh ngatoer ini, sediloeh repot itoe! Pendek neh matjem loe itoe repot adja! Tapi kabeh kedja goenanja orang embong. Neh sama goea deweh 'ndah ada djeboesnja! Tjoba loe pikir, sih anoenja goea titip loe doea etjee, tah soeroe pegi Djamoe iboe beli galian parem, mana sekarang soedah obatnja 'ndah dateng, doeitnja 'ndah balik. Itoe goea soeroe pertjaja matjem loe! Marinja dikedja apa doeit itoe?

-Anoe, nona! Itoe apa, sih anoenja goea maoe beli anoe……

-Soedah djangan ngbrol tjari alesan! Sih anoenja dikedja beli anoe! Sapa sing ngerti! Moesti loe ini maen gila! Ajo bilang, kedja apa doeit itoe? Apa loe kedja ‘mbelakrah?

-Apa nona kira doeit 20 cent bisa dikedja plesir?

-Hm! Baek bagoes! Djadinja baroe sekarang goea ini taoe neh loe biasa keloear masoek soehian! Mangkanja loe taoe taripnja!

Apa jang kamoedian, kedjadian saja tjoema bisa tebak sadja si Swee Siauw kedengeran merintih, saben kali telapakan tangan jang diadoe sama pipi kasih soeara seperti pembatja kasih tepak aer.

-Adoe! Ampoen, ampoen nona! Soenggoe mati goea 'ndah taoe satoe kali ngindjek soehian! Begitoelah kedengeran si Swee Siauw meratap.

-Loe djangan omong kosong! Neh betoel matjem loe ini di loearan 'ndah maen gila, loe sekarang moesti soempah!

-Ja, ja goea soempah! Neh nona sih 'ndah per…tjaja, tjoba nona tanja sama orang² sing goea kenal.

-Apa loe kira goea soedah gila, maoe tanja sama kontjo loe! Lawong kabeh djadi sakomplot tamtoe soedah maen sekongkel disih! Neh ada moeka goea adja poera² alim! Sapa taoe dibelakangnja? Mangkanja goea dari doeloe 'ndah soeka neh loe saben² keloearan. 'Ndah woeroeng ‘mbiah²an! Hm! Lawong matjemnja orang laki bloko. Sing sih diperangi boentoetnja ini sih akeh akalnja, apa lagi neh pasan dioembar, nanti kan bedigasan kja bedes sing oetjoel naek genteng. Pendek gini adja, neh loe maoe goea 'ndah sakit loe djangan pegi!

-Tapi………… tapi………… kaja apa nona! Goea ini djadi voorzitter, djadi………

-Goea 'ndah perdoeli loe djadi presiden, djadi poorsitter, tapi goea 'ndah soeka loe klajapan saben malem! Sama`an apa 'ndah ada gantinja? Soeroe sekertarisnja ngewarnemi loe!

-Tapi, 'ndah bisa, nona, sebab ini vergadering betoel penting!

-Piro kali goea moesti bilang? Neh loe goeneman sama goea djangan pake kaja pergadring gitoe; penting, sing apa. Tjoba goea maoe taoe, mana soeratnja?

-Ini apa, nona. Tjoba nona liah ; soal Tjin Tjay Hwee. Amat penting! djawab Swee Siauw dengen boeroe². Dari tekoekan soearanja kentara si Swee Siauw masih kandoeng pengharapan boeat dapetken ia poenja pasport.

-Hm! Ja, neh boeat negeri Tjina apa boleh boeat! Tapi loe djangan kaja si Anoenja itoe. Moso maski ngoeroes dermaan negeri Tjina, 'ndah taoe pasan djeboes sampe Modjoekerto, Djoembang, Kertosono. Koh eloe 'ndah maoe teroes pegi Tiongkok sekali, djadi karoean goea ini! Marinja djam piro loe poelang?

-Itoe tergantoeng dari beresnja oeroesan, nona!

-Goea ini sekarang soedah sabaran, sebab katanja boeat ngatoer dermaan. Tapi loe djangan kedja goea moentap lagi! Tergantoeng beresnja oeroesan! La ‘mboh bilango neh soedah mari gitoe adja, ilang bagoes loe apa? Tapi loe sekarang goea kasih permisie, djangan pasan loe 'ndah taoe wajah! Pendek neh sampe djam 12 loe belon poelang, goea koentji pintoe. Loe boleh tidoer ‘ndih langkan loear adja, biarno di tjokot lamoeh, biarno masoek angin, soeka² loe!

-Loe kedja apa pake dai baroe!? Katanja maoe pergadring. Djangan² goea ini loe kedja maenan adja. Toba liah soeratnja? Tanggal piro?

-Ini apa nona, betoel tanggal satoe! Kata Swee Siauw dengen boeroe².

-Ja betoel tanggal satoe! Loo, la neh gitoe, tadikan loe terima bajaran?

-Kapan nona tadi sore soedah rakoep semoea? Djawab Swee Siauw jang roepanja makin lama makin berani, koetika liat si matjan betina moelai gojang boentoetnja.

-Marinja neh 'ndah goea sing njimpen kabeh, 'ndah woeroeng loe kedja rojalan 'ndah karoean! Lawong matjem loe memang 'ndah taoe reganja doeit. 'Ndah bole pengang doeit setitik adja. Pasan rokonja Dapros sing 15 cent! Sama`an rekening beras 'ndah dibajar? Rekening sekola apa maoe dikemplang! Witno goea bolenja ngerewangi orang laki 'ndah koerang²! Soedah sing boelan disih goea maoe beli saroeng Pekalongan sing pake liris woengoe, tapi sekarang goean 'ndah perdoeli. Timbang doeit loe kedja 'ndah keroean, lebi baek goea besok pagi tah belino saroeng itoe. Nanti loe deweh goea kedjahno pijama sing doea etjean sa-ilo. Mangkanja loe sing taoe ditjinta orang wedoh!

-Abis nona maoe dasi sing goea pake? Tanja Swee Siauw jang soedah koentjoep lagi, koetika liat istrinja moelai ngotot poela.

-‘Mboh! Maski orang! Loe ini neh 'ndah djadi gawenja orang wedoh, 'ndah lilō! Moso dasi adja pake repot! Itoe loo, sing item adja. Loe neh pegi malem, djangan pake dasi soetra. 'Ndah goea soeroe pake dasi tjita soedah oentoeng loe! Doeitnja soedah poenja? Nanti neh poelang koedjanan, loe pake dokar, tapi tawaran disih, sekarang moerah koh! Mana tepak loe? Ini doeit loe sing sa-ripis goea toekari.

-Itoengan disih; sa-etjee, doea etjee, sama setali, sama bolong tiga, djadi tiga talen, soedah tjoekoep, kedja apa loe bawa sa-ripis? Tapi ati², besok pagi goea itoeng lagi doeit loe kari piro. Djangan² loe maen gila! Sekarang loe bole pegi, tapi djangan sampe malem². Neh soedah mari pergadringnja, loe teroes poelang. Djangan ngobrol teroes lali wajah!

Koetika taoe si Swee Siauw tida lama lagi aken keloear, saja boeroe² lari ka pekarangan depan dan toenggoe ia disana. Saja djeri oendjoeken moeka pada ‘nsoo Swee Siauw jang maen srobot tetamoe soeaminja sebagi djrangkong dan laen² gelaran poela.

Di sepandjang djalan si Swee Siauw diam; saja djoega. Tjoema kadang² saja denger ia mengelah napas.

Dalem hatisaja soedah ambil poetoesan pasti, djika dihari kamoedian si Swee Siauw letaken djabatan sebagi voozitter dari perkoempoelannja saja maoe voorstel, soepaia, sebage tanda penghargaan ledennja koempoelken sedjoemlah oewang boeat beli seprangkat piring dan tjangkir oentoek souvenir bagi bekas voorzitternja.

Selaen dari itoe, tambah tegoeh poela adanja saja poenja kepertjaja`an, bahwa Tiongkok di achirnja aken bisa keloear dengen kemenangan jang gilang-goemilang. Si Swee Siauw poenja pengorbanan dan ketabahan hati dari Tiongkok poenja pasoekan jang sekarang adoe djiwa digaris perang. Siapa jang aken bisa bikin taloek satoe negeri jang poetranja tida djeri ambil paspoortnja boeat pimpin vergadering TJIN TJAY HWEE via gamparan dari istrinja?

Super-nsionalisme begitoe tida bisa dilawan!

TJAMBOEK BERDOERI.(ending jang keren banget)

Si Swee Siauw dan Tjin Tjay Hwee-nja (II)

Saptoe 16 Apriel 1938. (II)

Krieng-kreing-kreing!
Zonder pedoeliken lagi jang kerandjang djaitannja djato ka bawah, kerna kena kesampok oleh tangannja, saking kesoesoenja, 'nsoo Swee Siauw berbangkit dari krosinja dan boeroe² samperin telefoon.
-Ja, hallo! Siapa jang bitjara?
-……………………………………………………………… ……………… ………
-Ada, tapi maoe apa?
-……………………………… ………………………
-Jang bitjara ini njonja Swee Siauw! Disana siapa?
-…………………………………
-Kalo tida maoe kasi taoe, djoega tida perloe bitjara!
Djembrang! Bekakas pendengernja telefoon dibanting ditempatnja serta 'nsoo Swee Siauw, dengen aer-moeka seperti tepekong jang sakit rheumatiek dan tindakan tjepet pergi keroewangan makan, dimana si Swee Siauw lagi doedoek.
Boekannja si Swee Siauw tadi djoega tida denger boenjinja telefoon, tapi djika ia toch tinggal diam, ini hal disebabken kerna Swee Siauw, di sepandjang sekenanja banjak taon jang ia menikah, sampe taoe betoel bagemana besarnja adanja rasa tjemboeroean dari istrinja. Tida oesah sampe bitjara, sedeng kalo ia brani terima telefoon sadja zonder sang istri taoe, siapa jang berada dioedjoeng laennja, ini kelantjangan soedah bearti perang-sabil, dalem mana si Swee Siauw selaloe berada di pihak jang keok.
Maka itoe bisa dimengerti jang dalem roemah-tangganja si Swee Siauw, roentoetan tingkatan dibagi begini:
Nommer een, dat is ‘nsoo Swee Siauw;
Nommer twee, anak²nja Swee Siauw;
Nommer drie, baboe dan djongos jang paling bisa ambil hartinja njonja-roemah.
Nommer vier, si Moppie, ‘nsoo Swee Siauw poenja andjing;
Lantas dateng gilirannja beberapa nommer blanco dan jang paling boentjit baroe moentjoel si Swee Siauw.
-'Ndah, kontjo loe mana sing beh 'ndah taoenja adat gitoe! Moso, soedah roemahnja orang kedja tilpoon²an, pake bilang “owee maoe bitjara sama 'nko Swee Siauw sendiri”. Apa dikira goea ini djadi kosèt apa dlingklik?
-Sing telefoon tadi tah rasa Liang Tien. Itoe apa perkara………
-Goea perdoeli apa sama Liang Tien? Koh pake 'ndah maoe bilang namanja? Moesti loe didjah sekongkelan; taoe maoe maen gila sama sapa; taoe ngelomprō pegi mana?
-Ah, awahnja ini koh selaloe gitoe adja. Sangawah 'ndah berboeat apa², tapi selaloe awahnja…………
-Tjoba loe brani koerang adjar ‘ndih loearan, kan soeda soewih loe tah ratjoen! Lawong sih loe goea pegang keras gini, sih tjoba brani maen gila, apa lagi neh dioembar, liahno neh 'ndah pegi pagi poelang malem, pegi malem poelang pagi.
Si Swee Siauw tjoema bisa golengken kepala sadja; ia pikir tjara membantah begini ada jang paling selamet. Tapi djoestroe itoe matjem penjangkalan bikin sang istri mendjadi lebih mendongkol lagi.
-Loe djangan pake godak-godek kajah golek Djepang. Selamanja loe neh kalah bantahan, woeroengnja ‘mbisoe, tamtoe mantak-mantoek kajah orang sing soedah boejoeten! Biarno goea pertjaja! ‘Mboh, matjem orang laki blōkō! Neh ada moeka bodjonja adja poera² alim. Tapi neh goea noleh sediloeh, loe soedah djelilatan kajah maling!
-Tapi kapannja sangawah taoe gitoe? Memprotest Swee Siauw sembari tangannja pegang piring, jang aken digoenaken sebage tameng djika istrinja mendadak lemparin ia sama barang ini atawa itoe, seperti biasanja.
-Hm! Loe sih brani ngaling? La njonja Blanda sing biasanja naek sepeda liwat sini koh saben² noleh? Moesti loe ini kemal sama dia. Neh 'ndah ada apa²nja, moso saben liwat roemahnja orang, moesti pringas-pringis. Troesno adja ja, nanti neh 'ndah ada orang dilabrak pinggir embong, loe djangan panggil goea.
-Sangawah brani soempah! Djangan lagi ada apa²nja, sedeng kenal sama njonja itoe sama sekali 'ndah!
-Loe apa kira goea ini pitjek? Mangkanja goea doeloe moelo 'ndah soeka loe tjampoeran ada ‘ndih loearan. Koempoelan ini, koempoelan itoe! Sediloeh djadi lid gemeente; sediloe maoe diangkat djadi wethouder. Tah kirano pekoro loe maoe djadi wethouder itoe, mangkanja njonja itoe saben² melirik kemari!
Si Swee Siauw teroes tinggal boengkem. Pengalaman jang ia dapetken disampingnja itoe istri jang galak kasi ia peladjaran sesoeatoe prempoean oemoemnja soeka membawa kemaoeannja sendiri. Teroetama kepala batoenja ‘nsoo Swee Siauw ada lebih keras dari beton tjampoeran besi.
-Mangkanja goea sih kapan hari sampe kajah apa 'ndah bole loe mēloh tjampoer oeroesan pasar malem derma. 'Ndah woeroeng loe ada sana tjoema ngobrol adja; bisanja djekikah-djekikih, klētjam-klētjem kajah tandak bedes! Kari goea sing soeroe djaga pintoe? Koh beh bagoesnja matjem loe! Pendek, loe neh awah boleh keloear tjari doeit, tapi neh soedah malem djangan harep loe maoe ‘mbiah²an ada pinggir djalan, kan tjoema orang laki sing goblok, sing 'ndah maoe ngadjemi bodjo, sing maoe klēlēran ada embong, maski loe ‘mbawa goea, keneh apa? Mala tambah adjinja!
-Tapi orang laki itoe, diseblahnja djadi toekang-tjari doeit, toch moesti djoega poenja tanggoengan sociaal? Mana bisa orang laki………………
-Goea piro kali soedah bilang, neh kiranja loe maoe kerdja goenanja orang embong loe doeloenja 'ndah oesah kawin goea. Sekarang goea soedah djadi bodjo loe, abis loe maoe kedja sembarangan? Tjoba`en adja, nanti neh 'ndah ada kepalanja orang sing botjor, baroe loe taoe rasa!
Denger itoe antjeman, lehernja Swee Siauw jang soedah pendek djadi lebih mengkeret lagi. Sembari bijvoorbaat goenaken itoe piring sebage tameng, boeat djaga kalo² ada barang jang menjamber, ia tjoema berani liat istrinja saben kali boeat beberapa saat sadja. Kerna begitoe lekas ‘nsoo Swee Siauw bikin gerakan sama tangannja, begitoe lekas djoega Swee Siauw ambles dibelakangnja itoe piring.
Mendadak dari roewangan depan kedengeran soeara “Pos!”.
Poen kali ini ‘nsoo Swee Siauw jang madjoe kedepan sedeng soeaminja dengen napas lega berani taro itoe piring-pelindoeng diatas medja. Soedah lama Swee Siauw taoe, sampe dimana loeasnja ia poenja hak boeat boleh terima soerat. Djangan seantara jang diadresken padanja, sedeng soerat² jang dialamatken pada namanja sendiri semoea, lebi doeloe moesti via ia poenja istri. Teroetama soerat jang diboeboehi perkataan prive djoesteroe jang paling diperhatiken.
Koetika denger tindakan sang bini mendatengin poela, Swee Siauw poenja tangan soedah pegang lagi piring, sebab soedah pernah kadjadian, koetika ‘nsoo Swee Siauw trima soerat boeat soeaminja dengen toelisan tangan jang ampir mirip sama toelisan tangan prampoean, zonder preksa isinja lebih doeloe, mendadak aer-moeka Swee Siauw digoejoer sama koffie. Belakangan ternjata itoe soerat ditoelis oleh Swee Siauw poenja oom jang itoe waktoe berada di Betawi.
-Ini loe soerat loe! Dari ‘ntjik Lok Sioe! Kajah apa loe ini? Sing perkara perloe 'ndah maoe lantas dioeroes! Piro sih soewihnja pegi Pasar Bong? ‘Mboh, mandek disoeore beli manoek berkoetoet adja, sampe ditoelis doea kali. Tjoba orang embong sing soeroe, la ‘mboh malem kaoedjanan loe djalan! Soek pagi perloeno, djadi neh 'ntjik Lok Sioe soedah dateng, berkoetoetnja soedah ada. Djadi ada toewasnja orang dipeseni orang toewa! Soerat sing ini loe 'ndah bole trima disih; ditoelis tjara Blanda, mana goea ngerti, nanti adja neh Liong Bing soedah dateng, tah soeroe ngertihno disih! Tapi ati² loe neh boeninja sampe 'ndah karoean! Hm! Moesti ini ada akal loe, sebab loe taoe goea 'ndah ngerti tjara Blanda!
-Mana sih sangawah ngertino!
-Koh bagoes loe! Apa loe kira goea ini arek kemaren sing loe bisa goroi melek-melek? Neh matjem loe sing ‘mboeninō, tamtoe goea ini loe slēmoernō laen! Koh goea maoe loe akali! Orang laki selamanja………………
Thuut! Thuut! Thut!
-Loo, sapa sing dateng?
Sembari oetjapken perkata`an terseboet, ‘nsoo Swee Siauw boeroe² keloear. Tadinja jang dateng dikira ‘nsoo Boen Kioe, jang memang mendjadi sobat kentelnja. Tapi koetika liat jang toeroen dari itoe auto ada tiga siansing, ‘nsoo Swee Siauw poenja aer-moeka lantas berobah seperti ‘mbok-‘mban jang keilangan soesoernja. Kerna lebi doeloe ‘nsoo Swee Siauw soedah bisa tebak, pasti kedatengannja itoe tiga siansing berarti si Swee Siauw maoe diadjak pergi.
-Apa owee bole bitjara sama 'nko Swee Siauw, ‘nsoo? Tanja salah-satoe dari itoe tiga tetamoe.
-Ada oeroesan apa 'ntjik? Laki saja tida enak badan!
-O, tjialat kalo begitoe, ‘nsoo sebab 'nko Swee Siauw ini malem moesti dateng di vergadring oeroesan fancy fair Tjin Tjay Hwee. Apa sekiranja 'nko Swee Siauw masi bisa kaloearan? Sebab kalo tida, nanti vergadring kepaksa moesti ditoenda lagi, kerna 'nko Swee Siauw jang pegang semoea tjatetan.
-Kapannja laki saja toeroet, 'ntjik? Sebab dianja tida bilang apa²! Djawab ‘nsoo Swee Siauw jang itoe waktoe mendongkolnja boekan maen ternjata si Swee Siauw brani “maen gelap”.
-Soedah sedari moelai comite fancy fair diberdiriken, ‘nsoo. Dan owee harep djoega comite bisa dapetken sekali ‘nsoo poenja bantoean jang berharga, soepaia maksoed kita dapetken hasil sabesar-besarnja bisa.
Kendati mendongkolnja masih ada restantnja, toch itoe oesapan pasal bantoean jang berharga dirasaken sedikit enak djoega oleh ‘nsoo kita.
-Mari 'ntjik doedoek, nanti saja liat doeloe!
Itoe tiga tetamoe tida mendoesin bagimana selagi mereka menoenggoe, disebelah belakang soedah terdjadi kabinet-crisis jang heibat. Tjoema sadja itoe semoea distem pianissimo alias perlahan sekali, sebegitoe djaoeh orang bisa bitjara pasal pelahan boeat soearanja ‘nsoo Swee Siauw, jang biasanja bertereak dan menggebrak didepan soeaminja.
-Itoe orang soeroe pertjaja sama matjem loe? Baek bagoes! Djadinja loe brani meloe toeroet tjampoer oeroesan pasar malem zonder permisi goea? Sekarang goea soedah 'ndah perdoeli lagi. Neh loe memang 'ndah keneh goea ēman, soeka² loe! Neh nati loe soedah sakit awak loe, soeroe pasar malem sing ngeriki! Djangan pake sambatan sama goea neh masoek angin! Dasar laki 'ndah entos. Loe sekarang maoe pegi? Pegi sana soedah! Babah loe 'ndah poelang, teroes tidoerō ada ‘ndih pasar malem, goea poesing apa?
-Tapi ini boeat Tjin Tjay Hwee, mangkanja sangawah………
-Itoe Tjin Tjay Hwee kan tjoema kedja pawatan adja, biarno loe bisa keloearan malem! Koh goea maoe loe pake poeter²! Soedatah, loe sekarang djangan pake akeh goenem, moendah² loe deweh sing isin, neh goea sampe gebrak² ada sini! Loe maoe pegi goea 'ndah ‘nggadoli! Laki koerang adjar! Moso goea ini dikedja maenan! Apa loe kira goea ini goendik²an, apa golēkan? Biarno adja, neh 'ndah dikedja isin, 'ndah kapok² orang laki kajah matjem loe ini! Loe maoe pegi, goea 'ndah perdoeli, tapi gigi loe moesti ditjopot disih!! (hahahaha……)
Kerna ‘nsoo Swee Siauw makin lama makin sengit dan soearanja makin ngotot, tambah kedengeran keras, djadi apa boleh boeat, oentoek toetoep rasa maloenja terhadep pada tetamoenja, Swee Siauw kepaksa lotjotin ia poenja sebaris gigi palsoe disebelah atas. Dan dalem keadaan separo ompong begitoe ia berangkat ka vergadering.
Tapi kendati Swee Siauw bisa toeroet berhadir djoega, toch comite kepaksa moesti toenda itoe pertemoean sampe di laen kali, kerna Swee Siauw poenja verslag tida bisa didengar, sebab perkata`an² jang dioetjapken selaloe kedengeran seperti ngowosnja band auto jang botjor.

TJAMBOEK BERDOERI.

Si Swee Siauw dan Tjin Tjay Hwee-nja (I)

Djoemahat 29 Apriel 1938.

-Ha-ha-ha-ha-ha! Wa, loe ini bisa adja!
Sembari ketawa bergelak-gelak, Sioe Jam-sia ajoen dirinja di krosi-gojang. Sebab memang biasanja kalo ia lagi ketawa, selaloe matanja jang sipit tertoetoep rapet, maka itoe Sioe Jam-sia tida bisa liat, bagimana doea gondalnja, si Swee Siauw dan Bing Sam, masing² bitjara dengen gerakan sadja. Swee Siauw manggoet² koetika liat Bing Sam dengen tjepet oendjoeken 10 djarinja.
Tida bisa disangkal lagi itoe gerakan² ditoedjoeken pada Sioe Jam-sia jang di Soerabaia terkenal sebagi orang jang rada pedet kantongnja, tapi kosong kepalanja. Dan menoeroet traditie, orang jang begitoe oemoemnja gampang dioempak. Dan djika itoe oempakan soedah seboel si kodok mendjadi kerbo (kendati dalem anggepannja sendiri) sitoekang mengoempak bisa pastiken jang oempakannja aken berobah mendjadi krientjingnja doeit jang mengalir dalem sakoenja.
Dan djoesteroe Swee Siauw serta Bing Sam memang terkenal sebagi djempolnja toekang-mengoempak. Tida heran si kepala dogol jang beroepa Sioe Jam-sia terseboet, manda dirinja ditendang kian-kemari oleh oedjoeng lidahnja itoe doea gondal.
Waktoe liat Sioe Jam-sia poenja ketawa soedah mendjadi koerangan, hingga matanja pelan² terboeka lagi, boeroe² Swee Siauw djawab:
-Betoel ’nsia! Masa owee brani maen gila sama ‘nsia? Kan ja, Sam, si anoenja oom Tiong Gie kan bilang, di Soerabaia tjoema ada satoe jang betoel² kaja. Sapa sing bisa nandingi Sioe Jam-sia?
Owee, ‘nsia. Mala ada lagi jang bilang, wa, kajah Sioe Jam-sia itoe memang djarang, di tanah Djawa tjoema ada doea jang masoek golongan twa-wan-gwee. Satoe di Semarang dan jang laennja di Soerabaia. Siapa lagi kaloe boekan ’nsia jang dimaksoedken?
-Tapi apa betoel orang bilang gitoe? Djangan² tjoema bisa²nja loe adja! Sebab bangsa khittjiah kajah matjem loe memang soeka djoeal moeloet, kata Sioe Jam-sia jang kombali ajoen dirinja, sementara djeridji tangan-kanannja menggeremet dalem sakoenja, hingga bikin sedjoemlah oewang perakan mendjadi saling beradoe. Dan bentoeran ini timboelken soeara jang bikin Swee Siauw boeroe² bilang:
-Soenggoe mati ‘nsia! Orang seperti ‘nsia koerang apa lagi? Roemah besar, auto besar, djongos baboe sedia! Pakean sama makanan jang mana jang ‘nsia tida bisa beli?
-Betoel, tapi apa loe kira kabeh itoe 'ndah minta ongkos gedee?
-Ah, boeat orang jang begitoe hartawan seperti ‘nsia, itoe semoea ada perkara ketjil sadja! Djangan lagi jang begini, sedeng ‘nsia pake ongkos doea kali lipet, toch tida oesah pake poesing apa², kan ja, Siauw?
-Beotel, neh ‘nsia tjoema boeka lemari-besinja adja, 'ndah sampe teeken tjèk, loo, neh kaja loe sama goea ini, tamtoe laen, Sam! Lawong maoe beli topi adja, sih moendoer madjoe, koh! 'Ndah bisa ditandingno sama ‘nsia, jang 'ndah oesah apa², gojang kaki ada 'ndih roemah adja, doeitnja soedah bandjir. Loe djangan maen² doeit sewahan roemah adja saben boelan soedah beetjet! Djawab Swee Siauw.
Mendenger ini oempakan kosong, kombali si kepala dogol ketawa bergelak-gelak. Tapi bole djadi waktoe itoe moeloetnja terpentang terlaloe lebar, hingga oedara jang kesedot masoek ada terlaloe banjak, sampe menjebabken Sioe Jam-sia batoek².
Meliat tjoekoengnja berada dalem keadaan begitoe, boeroe² Bing Sam ambil dari belakang satoe tempat-loeda, sementara Swee Siauw oesap² gegernja Sioe Jam-sia.
-Hm! Hm! Khoek! Wa, soedatah, Swee Siauw tjampoer sama Bing Sam, toemboe boleh toetoep! Moso, apa loe kira lemari-besi goea ini, maski goea sampe poenja doea ada ‘ndih roemah, 'ndah bisa kosong? Mana bisa, ongkos roemah-tangga goea adja saben boelannja 'ndah tjoekoep ratoesan, loe taoe? Mana loe bisa nandingno sama reganja topi sing loe maoe beli? Loo, ja, perkara topi itoe kajah apa? Sih anoenja loe soedah minta doeit, katanja topi loe matjemnja soedah kajah orang djembel. Koh sekarang sih kajah gini adja modelnja?
-Owee, ‘nsia! Tapi kapan hari owee betoel perloe oewang, djadi oewang jang ‘nsia kasih, owee sampe tida brani beliken topi. Sama`an harganja terlaloe mahal, ‘nsia! Djawab Swee Siauw dengen aer-moeka jang sengadja dibikin seperti ia lagi kagoemin topinja Sioe Jam-sia.
-Wa, loe ini roepanja 'ndah ada akehnja doeit! Moso sih anoenja soedah ngemis sama goea tjaptoen, katanja kedja beli topi. Sekarang topi belon dibeli, doeitnja soedah abis! Apa loe kira goea ini goedang doeit? Loe neh beli topi djangan beli sing kajah topi goea! Tamtoe adja loe 'ndah bisa, sebab loe liah, reganja topi ini tjoekoep boeat ongkosin roemah loe seboelan, loe taoe? Goea sih anoenja beli ada ‘ndih toko Hopman, djigotoen!
Mendenger itoe harga 25 roepia, Swee Siauw dan Bing Sam, seperti andjing-koemedie koeda jang soedah dapet peladjaran, doea² poera² kaget dan ampir sadja kesima, kendati mereka taoe harga 25 perak sebenernja ada harga jang sengadja dikasih naek, oleh Sioe Jam-sia sendiri, dengen maksoed bikin doea gondalnja mendjadi lebih kagoemin lagi itoe “radja-oewang”.
-Wa, Sam! Tjoba loe liah, sedeng topinja adja soedah djigotoen, apa lagi laen² barangnja! Kata Swee Siauw pada Bing Sam, sembari kasih kedjèban mata boeat andjoerin itoe temen boeat bantoe mengoempak, kerna sekarang soedah dateng waktoenja boeat odol sakoenja si Sioe Jam-sia, jang menoeroet kebiasaan, gila-hormatnja koemat lagi djika ia soedah moelai banggaken barang²nja jang semoea dikasih harga djaoeh lebih tinggi dari harga asal.
-Mangkanja, dari tadi kan goea soedah bilang, apa salahnja kalo orang Soerabaia namaken ‘nsia radja-oewang? Loe djangan pake akeh² ngeliahno tjintjin berliannja, loe sama goea soedah bisa klenger!
Mendenger itoe semoea oempakan, si kepala kosong boekannja mendjadi djemoe, malah ia sigra tondjoelken peroetnja jang gendoet jang dioesap-oesap poelang-pergi, sembari doedoeknja diatoer begitoe roepa, hingga si tjintjin berlian (jang matanja nota bene tjoema sebesar kedelee sadja) bisa “maen” lebi sering. Sioe Jam-sia berboeat begitoe dengen maksoed soepaia rasa kagoemnja Swee Siauw dan Bing Sam mendjadi makin lebih besar lagi. Tida taoe jang sementara itoe ia oleh doea gondalnja dimaki abis²an, kendati itoe makian dilakoeken geruischloos.
-Ja, memang neh kajah matjem loe gitoe, mana bisa noetoeti goea? Apa lagi soegih goea ini memang soedah dari djamannja goea poenja engkong! Kata Sioe Jam-sia. Sama’an orang soegih itoe soedah bawa`annja deweh². Loe liah adja roemah gini gedee, auto goea selendernja delapan, baboe sama djongos goea seakeh-akehnja, belon goea poenja khai-khaian. Mana bisa tahan neh memang boekannja orang jang betoel soegih?
-Betoel ‘nsia. Mangkanja djoega owee sama siapa sadja selamanja bilang ‘nsia ini memang orang-orangnja baek, mangkanja pantes kaloe ‘nsia dikaroeniaken kekajaan jang begitoe besar. Sama sapa si anoenja bilang itoe, Sam? O, ja, sama orang jang djoega masoek comite Tjin Tjay Hwee, owee bilang sama dia, ‘nsia, kalo Tjin Tjay Hwee maoe dapet hasil besar, moesti minta ‘nsia poenja pertoeloengan. Kan gitoe, ja, Sam?
-Apa? Ha-ha-ha……………
Si Bing Sam, jang kira bahwa Sioe Jam-sia teroes ketawa saking kepinginnja ambil hatinja si kepala dogol, zonder pikir lagi, lantas bantoe ketawa sekeras-kerasnja bisa. Tapi zonder terdoega lebih doeloe, mendadak Sioe Jam-sia berenti ketawa dan dengen aer-moeka jang oendjoeken perasaan sanget tida seneng hati, ia tinggal mendelik.
Ini semoea tida diketahoein oleh Bing Sam jang masih teroes sadja tinggal boeka moeloetnja sembari djoega merem’in kedoea matanja, boeat tiroe laganja Sioe Jam-sia.
-'Ndah, apa orang ini soedah gila? Tanja Sioe Jam-sia pada Swee Siauw, jang tida taoe lagi moesti berboeat apa boeat bikin betoel salah wisselnja ia poenja temen. Achirnja dengen satoe tendangan ke djoeroesan kakinja bikin Bing Sam brentiken ketawanja dan dengen heran liat itoe perobahanmoeka dari Sioe Jam-sia jang sekarang keliatan merengoet seperti prawan koeno ditarik kawin.
-Hm! Loe ini koh beh koerang adjarnja, Sam! Loe kira tadi goea maoe nggoejoe, gitoe! Loe 'ndah taoe, waktoe Swee Siauw ngomong Tjin Tjay Hwee poenja comite, goea djadi inget lagi itoe perkara. Moso, soedah dateng minta goea derma`an, pake 'ndah taoe adat. ‘Mboso goea ngasi-i tjetoen, loe taoe bilang apa? Goea diminta doeit lebih banjak soepaian goea ini hidoepnja masih ada goenanja, katanja! Kan koerang adjar, tah?
-Wa. Owee, ‘nsia ! itoe botjing-lie! Tapi owee rasa jang bilang begitoe tamtoe belon kenal sama ‘nsia poenja hati jang dermawan! Djangan lagi sama TjinTjay Hwee, sedeng sama owee sama Bing Sam sadja ‘nsia begitoe taro hati kasian!
-Ja neh loe sih 'ndah ada apa², tapi Bing Sam ini tah pikir, tambah sowih tambah koerang adjar. Moso goea di goejoe-goejoe!
-Loo, tida ‘nsia! Kata Bing Sam dengen boeroe². Masa owee bangsa katjwa, brani ketawain ‘nsia? Owee brani soempah jang owee sama sekali tida ada ingetan boeat begitoe.
-Tapi loe tadi ada apa koh pake ngakak² kajah orang sing mosin? Tanja Sioe Jam-sia dengen oering-oeringan.
Ini pertanjaan Bing Sam tida brani djawab. Ia toch tida bisa bilang jang djika ia tadi ketawa, itoe meloeloe boeat oempakan sadja si kepala dogol? Bing Sam tida taoe, bahwa itoe ha-ha-hanja orang jang gergetan.
-Owee, ‘nsia ini kali owee moehoen ‘nsia soeka ampoein sadja! Membantoe Swee Siauw. Sebab memang Bing Sam selaloe tida taoe sengernja orang.
-Loe ini memang koerang adjar, Sam! Boekan loe maoe bikin seneng sama ‘nsia, maski loe saben² ditoeloeng kaperloean loe, malah eloe bikin ‘nsia marah! Pendek neh loe brani gitoe lagi, loe djangan harep ‘nsia soedi loe datengin!
Sioe Jam-sia, saking bodonja tida taoe bahwa itoe sikep toeroet marah dari Swee Siauw djoega tjoema beroepa oempakan sadja. Maksoednja sama seperti ketawanja si Bing Sam tadi, tapi kerna Swee Siauw ada lebih litjin, maka djoega ia tida sampe kadjeblos seperti Bing Sam.
Bing Sam sendir djoega mendoesin dan sekarang moelai poeter haloean. Ia doedoek terpekoer seolah-olah lagi pikirin jang ia poenja kedosaan jang besar.
Meliat itoe semoea Sioe Jam-sia, jang memang boekan satoe orang jang pinter, ketambahan seringkali digaroek doeitnja zonder berasa, asal sadja orang bisa “ambil hatinja” moelai seneng poela.
Mendapet “angin baek”, Swee Siauw tida maoe kasih liwat itoe koetika dengen pertjoema, hanja moelai atoer djalannja boeat pantjing doeitnja si kepala dogol.
Apa sadja jang ia koesak-koesoek sama Sioe Jam-sia, tjoema Swee Siauw dan korbannja jang taoe, sedeng Bing Sam sengadja poera² bawa pergi itoe tempat loeda, soepaia dengen begitoe djangan sampe ganggoe djalannja si Swee Siauw waktoe menggosok.
Ternjata Swee Siauw ponja lidah bener tadjem, atawa itoe ada mendjadi boekti dari kaldenja si Sioe Jam-sia, kerna tida lama kamoedian kaliatan Sioe Jam-sia rogoh sakoenja kasih keloear beberapa lembar oewang-kertas jang diterimaken pada Swee Siauw jang terima itoe dengen membongkok dan menjegir.
Tida lama kamodian Swee Siauw berpamitan dengen diikoet oleh Bing Sam dari belakang.
Koetika soedah berada di djalan besar, jang dimaksoedken belakangan ini boeroe² tanja:
-Piro? Si Gila ngasih piro?
-Wa, loe ini goblok betoel!
-Tjoba boekan goea lantas tendang loe, boleh djadi si gila teroes ngamboel. Ini loo, tadinja goea maoe minta seratoes, tapi sebab loe sing kedja roesoeh, maka goea 'ndah brani minta segitoe. Tapi bolenja ini kali ja loemajan djoega.
-Gotjap ja, djadi loe djigotoen, goea djigotoen!

TJAMABOEK BERDOERI.

LANDLOOPER

Malem 27 Mei 1974, Sepoelang dari tempat prakteknja dokter Hanafi, ia teroes saja bersender pada peondak ia poenja poetri jang semata wajang, dibelakang koemodi mobil Hoelden, tampa sepatah kata atawa sendaoe goeraoe jang ia biasa lakoeken, hanja saben² ia toleh wadjah ia poenja anak dengen diikoetin senjoem manis. Sesampenja di roemah langsoeng ia berbaring di ia poenja randjang, kali ini sang poetrinja dampingin ia hingga pagi mendjelang. Djam 5 pagi dengen soeara keras ia mendekoer! sanget keras diloear dari ia poenja kebiasaan mendoekoer, seaken ia mengabarken pada doenia jang sebentar lagi aken ia tinggalken, makin lama dekoerannja makin perlahan, dan teroes perlahan………… dan perlahan. Tepat djam 6 pagi ia telah berpoelang oenteok selamanja. Ia tinggalken ini doenia tampa satoe patah pesan atawa permintaan, tampa perloe banjak orang taoe ia telah berpoelang, tampa perloe ia repotken orang banjak, tampa perloe adanja ketjemasan dari banjak orang.

Och! Roepanja ini soedah kehendak Toehan, begimana tjara ia panggil hambanja jang semasa hidoepnja soedah seringkali memboeat banjak orang djengkel, kesal, sedih bahken hingga sakit ati, namoen tida sedikit poela jang merasa terhiboer malah sampe perloe melepasken gelak tawanja, dari ia poenja toelisan²nja jang banjak beredar!

Kota Pasoeroean ia bermoela, jang selandjoetnja: Toeloeng Agoeng, Bangkalan, Pamengkasan, Soemenep, Malang, Djember, Madioen, Kediri, Soerabaia, Semarang, Bandoeng, setaoe berapa nama kota di poelaoe Soematera, negeri Djiran dan berachir di Kebajoeran Baroe Djakarta Selatan. Masih belon poeas ia bolak balik ia inapin kota² diatas, bahken hingga ia kepaksa moesti menginap di Kalisosok dan Tjipinang boeat betapa selama 10 boelan ia djalani.

Sebagian orang aken heran dan bertanja apa istimewa-nja hal² semoea diatas? Bener itoe boekan hal jang istimewa djika dilakoeken oleh seorang hartawan, kesohor, atawa bandit sekalipoen. jang memang soedah mendjadi kerdjaan dan keharoesan disaat sekarang ini.

Tapi ini dilakoeken di koeroen taon 1900-1974, dimasa pendjadjah Blanda berkoeasa, di zaman Malaise, dimasa pendoedoekan balatentara Dai Nipon, dimasa awal meletoesnja revoloesi ini negri, hingga dimasa redjim “Orde Baroe” masih mendjadi orok. Ini semoea dilakoeken oleh seorang peranakan Tionghoa sadja. Sekarang saja maoe bertanja pada pemabatja: panteskan itoe peranakan Tionghoa saja namaken si Landlooper toelen?

28 Mei 1974 berachirkah perdjalanan si Landlooper!?

Sebage manoesia jang ia poenja napas, djelas soedah berachir, bagemana dengen djasatnja?

Ai, kali ini! Boemi jang boelet jang dapet gilirannja. Begimana tjara dan kedjadiannja itoe djasat kiterin boemi jang boelet? Semoea aken saja toetoerken dibawah ini:

Demi soeatoe pembangoengan! Itoe selogan jang dikoemandangi oleh satoe redjim, apapoen jang berani tjoba menghalangi itoe aken dapet moesibah. Bener kali ini giliran si Landlooper koedoe rasain itoe kabidjaksanaan dari sang Petroek, dengen kepaksa tempat mengasonja si Landlooper di Tanah Abang I. itoe djasat moesti angkat kaki dari itoe tempat. Laloe kremasi djasat djadi pilihannja, jang kamoedian itoe kerikil² djasat dari si Landlooper setelah ditoemboek sanget aloes, dilemparken ke laoet Djawa. Djoesteroe dari pelemparan terseboet maka djasat si Landlooper moelailah aroengi 7 samoedra jang ada di ini boemi jang boelet. Ironis sekali?

Tentoe bagi pembatja jang soeka ikoetin ini web, pasti soedah bisa tebak siapa nama sedjati dari si Landlooper jang saja maksoedken!
Tapi tida ada salahnja kaloe saja terangken, ini semoea bergoena khoesoes boeat pembatja jang baroe pertama kali taoe alias belon taoe, moengkin djoega boeat mereka jang poera² tida taoe.
Saja harep soedahilah kesakit-hatian sekiranja pembatja atawa siapapoen jang kebetoelan poenja ‘mbah dan ‘mah - boejoet jang semasa hidoepnja pernah rasaken tjamboeknja si Landlooper. Jang sebetoelnja tampa ia mendoesin, sesoenggoehnja itoe tjamboek jang membeset di ia poenja hati hingga ia besedih dan berdoeka. Meroepaken soeatoe pengoerangan dari ia poenja dosa, karena ia soedah disakiti hatinja oleh si Landlooper. Tegesnja itoe pengoerangan dosa soedah dipikoel sendiri oleh si Landlooper kerna ia soedah bikin hati orang sakit dan bersedih.

Tapi kita semoea taoe Toehan itoe tida bodoh boekan! Kerna si pemboeat sakit hati soedah begitoe berani pikoel semoea dosa orang jang telah ia tjatji maki, jang pada dasarnja memang betoempoek-toempoek ia poenja dosa, hingga perloe diambil sedikit dari jang bertoempoek terseboet, maka Toehan poen soedi memberi gandjaran jang baek pada orang jang soedah berani tjoetji dan gasak sampe bersih itoe dosa.
Maka dari hal diatas kita aken moefakat bahwa sesoenggoehnja tida ada jang dikalahken, semoeanja memang jakni orang jang bersedih karena di tjatji maki aken mendapet pengoerangan dari ia poenja dosa, sedengeken si Landlooper aken terima satoe punt dari ia poenja oesaha gasak sampe bersih dosa orang terseboet.

Oopss! Maap pembatja agak pandjang saja oeraiken hal diatas, sampe² hal oentoek perkenalken nama sedjatinja si Landlooper agak tertoenda. Baek sekarang saja aken boeka resiahnja si Landlooper terseboet :

Ia bernama KWEE THIAM TJING alias si TJAMBOEK BERDOERI.

Bersamaan ini resia saja mohon pamit dan sebage pembritahoean pada pembatja, selandjoetnja aken terbit setjara berkala semoea toelisannja si Landlooper di ini web.